November 29, 2021

Ada Rata

All news in one location

ලොව වටිනාම 20යි-20 කණ්ඩායමට ශ්‍රී ලාංකික ක්‍රීඩකයින් දෙපළක්


එක්සත් අරාබි එමීර් රාජ්‍යයේදී නිමාවට පත් වුණු පන්දුවාර 20යි-20 ලෝක කුසලාන ක්‍රිකට් තරගාවලියේදී ක්‍රීඩකයින් දක්වන ලද දක්ෂතාවයන් මත පදනම් නම් කරන ලද ලොව වටිනාම 20යි-20 කණ්ඩායමට ශ්‍රී ලාංකික ක්‍රීඩකයින් දෙපළක් වන වනිඳු හසරංග සහ චරිත් අසලංකව ඇතුළත් කිරීමට අන්තර්ජාතික ක්‍රිකට් කවුන්සිලය පියවර ගෙන තිබෙනවා.

අතිරේක ක්‍රීඩකයකුද සමඟින් නම් කරන ලද 12 දෙනෙකුගෙන් සමන්විත මෙම කණ්ඩායමේ අංක 4 පිතිකරුවා ලෙස චරිත් අසලංකත්, තුන් ඉරියව් ක්‍රීඩකයා ලෙස වනිඳු හසරංගවත් එක් කර තිබෙනවා.

ලෝක කුසලාන තරගාවලියේදී කැපී පෙනෙන දක්ෂතා දක්වන ලද ක්‍රීඩකයින්ගෙන් සැදුම්ලත්ව නම් කරන ලද මෙම කණ්ඩායමට ශ්‍රී ලංකාවට අමතරව තවත් රටවල් 5 ක ක්‍රීඩකයින් ඇතුළත්ව සිටින අතර ඒ අතරට ඉන්දීය කණ්ඩායමේ එකම ක්‍රීඩකයකු හෝ ඇතුළත් නොවීම කැපී පෙනෙනවා.

මෙවර ලෝක කුසලාන ක්‍රිකට් තරගාවලිය යටතේ තරග 8 කට ක්‍රීඩා කළ වනිඳු කඩුලු 16 ක් බිඳ හෙළමින් තරගාවලියේ වැඩිම කඩුලු ලාභියා බවට පත්ව සිටිනවා.

කඩුල්ලක් දවා ගැනීමේ සාමාන්‍ය 9.75 ක් රඳවා තබා ගැනීමට සමත්ව සිටින වනිඳු දකුණු අප්‍රිකාවට එරෙහි තරගයේදී කඩුලු ත්‍රිත්වයක්ද දවා ගැනීමට සමත්වුණා. දකුණු අප්‍රිකානු නායක ටෙම්බා බවුමා, ඒඩ්න් මාකම් සහ ඩ්වයින් ප්‍රිටෝරියස්ගේ කඩුල් දවා ගනිමින් එම කඩුලු ත්‍රිත්වයට හිමිකම් කීමට හසරංග සමත්වුණා.

සුපිරි කණ්ඩායම් 12 අතර තරග වටයේ ලොව වැඩිම කඩුලු ලාභියා බවට පත්වූවේ චරිත් අසලංකයි.

තරග 6 කට ක්‍රීඩා කළ අසලංක රැස් කරන ලද ලකුණු සංඛ්‍යාව 231 ක් වන අතර එහි ඉනිමක ලකුණු ලබා ගැනීමේ සාමාන්‍ය ලෙස 46.20 ක් සටහන් කර ගැනීමට සමත්ව තිබෙනවා.

ශ්‍රී ලංකාවට අමතරව ලෝක ශූරයින් වුණු ඔස්ට්‍රේලියාව, අනුශූරයින් වුණු නවසීලන්තයට අමතරව එංගලන්තය, දකුණු අප්‍රිකාව සහ පාකිස්තානය යන රටවල් නියෝජනය කරමින් ක්‍රීඩකයින් එක් කිරීමට හිටපු ක්‍රීඩකයින්, විස්තර විචාරකයින් සහ මාධ්‍යවේදීන්ගේ එකතුවකින් සැදුම් ලත් පංච පුද්ගල කමිටුව පියවර ගෙන තිබෙනවා.

ප්‍රවීන විස්තර විචාරකයකු වන හිටපු බටහිර ඉන්දීය කොදෙව් ක්‍රීඩක ඉයන් බිෂොප් ප්‍රධානත්වය දරන ලද කමිටුවට හිටපු ඔස්ට්‍රේලියානු ක්‍රීඩක ෂේන් වොට්සන් මෙන්ම විස්තර විචාරයේ නියුතු නටාලි ජර්මානුස්, ප්‍රකට විස්ඩන් සඟරාවෙහි ලෝරන්ස් බූත් සහ ප්‍රංශ පුවත් සේවයේ නියුතු ශහිඩ් හෂ්මි යන මහත්ම මහත්මීන් ඇතුළත්ව සිටිනවා.

නම් කරන ලද මෙම කණ්ඩායමේ නායකයා ලෙස පාකිස්තානු නායක බාබර් අසාම්ව නම් කර තිබෙන අතර එම කණ්ඩායමේ කඩුලු රකින්නා ලෙස එංගලන්ත ක්‍රීඩක ජොස් බට්ලර් නම් කර තිබෙනවා.

ලොව වටිනාම 20යි-20 කණ්ඩායම පහතින්, (colombotimes.lk)

Viber



Source link